ភ្នំពេញ៖ ឯកឧត្តមសន្តិបណ្ឌិត គៀត ច័ន្ធថារិទ្ធ ប្រធាន សហព័ន្ធកីឡាវាយកូនឃ្លីលើតុ បានបង្ហាញពីការប្តេជ្ញាចិត្តខ្ពស់ ក្នុងការបន្តការអភិវឌ្ឍប្រភេទកីឡាអូឡាំពិកមួយនេះ ឱ្យមានដំណើរការ អភិវឌ្ឍកាន់តែរីកចម្រើនបន្ថែមទៀត ទោះជាសហព័ន្ធនៅតែជួបបញ្ហាប្រឈមនានាក្តី។
ការប្តេជ្ញាចិត្តរបស់ ឯកឧត្តមសន្តិបណ្ឌិត បានធ្វើឡើងនៅក្នុងសន្និបាត បញ្ចប់អាណត្តិចាស់ និងបន្តអាណត្តិថ្មី ទី៨ ឆ្នាំ២០២៥-២០២៩ នៅព្រឹកថ្ងៃពុធនេះដោយ ឯកឧត្តម ទទួលបានការគាំទ្រពី សមាជិកសន្និបាត ឱ្យបន្តដឹកនាំនៅអាណត្តិថ្មីនេះជាមួយ សមាសភាព គណៈកម្មធិការប្រតិបត្តិ សរុប ២៩ រូប។
ឯកឧត្តមសន្តិបណ្ឌិត គៀត ច័ន្ធថារិទ្ធ សង្កត់ធ្ងន់ថា នៅក្នុងអាណត្តិចាស់កន្លងទៅ សហព័ន្ធក៏បានប្រឹងប្រែងជាបន្តបន្ទាប់ ហើយនៅ អាណត្តិថ្មីនេះ ឯកឧត្តម និងសមាជិកទាំងអស់ នឹងបន្តពួតដៃគ្នា រួមឆន្ទៈគ្នាជាធ្លុងមួយ ដើម្បីបន្តការអភិវឌ្ឍឱ្យមានដំណើរការល្អជាមួយនឹងផែនការយុទ្ធសាស្ត្រ ជាជំហានៗផងដែរ។ បើទោះបីជា រាល់ដំណើរការអភិវឌ្ឍ តែងតែជួបឧបសគ្គ បញ្ហាប្រឈមកើតឡើងក្នុងពេលដំណាលគ្នាក្តី ក៏ប៉ុន្តែ ឯកឧត្តម និង គណៈកម្មការប្រតិបត្តិទាំងអស់ នឹងប្រឹងប្រែងឱ្យអស់ពី សមត្ថភាព និង លទ្ធភាព ជាមួយនឹងគោលដៅបន្តការបណ្តុះបណ្តាល គ្រូបង្វឹក និងធនធាន កីឡាករ កីឡាការិនីថ្នាល សម្រាប់បន្តវេនផងដែរ៕
