ភ្នំពេញ៖ ការប្រកួតកីឡាវូស៊ូជ្រើសរើសជើងឯកថ្នាក់ជាតិឆ្នាំ២០២៥ ក្រោមថវិកាឧបត្ថម្ភគាំទ្ររបស់ក្រសួងអប់រំយុវជននិងកីឡា និងសហការជាដៃគូឧបត្ថម្ភពីក្រុមហ៊ុន Z.T.O ដែលបានដំណើរការប្រកួតអស់រយៈពេល៤ថ្ងៃ ក្នុងវិមានកីឡដ្ឋានជាតិអូឡាំពិក បានបញ្ចប់ការប្រកួតដោយជោគជ័យ នាព្រឹកថ្ងៃទី៣១ ខែ មករា ឆ្នាំ២០២៦។
លោក ឧកញ៉ា ស្រ៊ុន ប៊ុនថាត ប្រធានសហព័ន្ធកីឡាវូស៊ូកម្ពុជា បានថ្លែងប្តេជ្ញាចិត្ត និងបន្តរៀបចំផែនការអភិវឌ្ឍរយៈពេល៣ទៅមុនទៀត ដោយក្នុងនោះមានទាំងការបណ្តុះបណ្តាលរយៈពេលវែងនិងខ្លី ពិសេស គឺពង្រឹងលើផែនការហ្វឹកហាត់ ដើម្បីឆ្លើយតបនិងគុណភាពត្រៀមចូលរួមការប្រកួតអន្តរជាតិនានាដណ្តើមយកមេដាយនាំមកជូនជាតិមាតុភូមិ។ក្រៅពីនោះ សហព័ន្ធក៏បន្តទាក់ទាញបង្កើតការប្រកួតក្នុងស្រុកឱ្យបានច្រើន ដើម្បីបង្កើនចំនួនកីឡាករការិនី និងមន្រ្តីបច្ចេកទេសប្រកបដោយគុណផលខ្ពស់។ ជាមួយគ្នានោះ ប្រធានសហព័ន្ធខាងលើ បានតាំងចិត្តនិងអភិវឌ្ឍឱ្យកីឡាវូស៊ូក្លាយជាប្រយោជន៍សម្រាប់មនុស្សគ្រប់វ័យឲ្យទទួលបាន ផាសុខភាពល្អ ទាំងផ្លូវកាយ ផ្លូវចិត្ត ផ្លូវបញ្ញា និងជួយឲ្យជៀសផុតពីភាពអសកម្មផ្សេង ៗក្នុងសង្គម ។
ឯកឧត្តម កែ ប៊ុនខៀង រដ្ឋលេខាធិការក្រសួងអប់រំ យុវជន និងកីឡា បានថ្លែងលើកឡើងដែរថា ជើងឯកថ្នាក់ជាតិនេះ ពិតជាមានសារសំខាន់ណាស់សម្រាប់កីឡាករ-កីឡាការិនីអភិវឌ្ឍង្កើនសមត្ថភាព ដើម្បីចាប់យកឱកាសក្លាយខ្លួនជាកីឡាករកីឡាការិនីជម្រើសជាតិហ្វឹកហាត់ត្រៀមតំណាងជាតិចូលរួមក្នុងការប្រកួតអន្តរជាតិនានា។
ឯកឧត្តម បានគូសបញ្ជាក់ទៀតថា ក្រសួងអប់រំ យុវជន និងកីឡា បានយកចិត្តទុកដាក់យ៉ាងខ្លាំង ចំពោះផ្នែករដ្ឋបាល ផ្នែកសកម្មភាពនៃការប្រកួត និងផ្នែកសកម្មភាព នៃវគ្គបណ្តុះបណ្តាលគ្រូបង្វឹក អាជ្ញាកណ្តាល ចៅក្រម តាមសហព័ន្ធកីឡាជាតិទាំងអស់ ដែលក្រសួង បានផ្តល់ថវិកាគាំទ្រដើម្បីជួយពន្លឿនការអភិវឌ្ឍវិស័យកីឡាក្នុងប្រទេសកម្ពុជា ។
ជាក់ស្តែងការលេងកីឡា គឺធ្វើឲ្យយុវជន បានស្គាល់គ្នា ចងមិត្តភាព សាមគ្គីភាព ការទំនាក់ទំនង និងកសាង សន្តិ ភាពព្រមទាំងនាំមកនូវសារៈប្រយោជន៍ផ្សេង ៗ មិនតែប៉ុណ្ណោះកីឡាដើរតួ ជាយានក្នុងការភ្ជាប់ទំនាក់ទំនងការទូត និងនាំ មនុស្សនៅក្នុង សហគមន៍ចេះរួមរស់ជាមួយគ្នា ។ កីឡាក៍បានដើរតួយ៉ាងសំខាន់ នៅក្នុងការផ្សារភ្ជាប់ ទំនាក់ទំនងវប្បធម៌ និងសហគមន៍ទូទាំងពិភពលោកផងដែរ៕
