ឆ្លងកាត់ការប្រកួតរយៈពេល ៣ ថ្ងៃពេញ នៃព្រឹត្តិការណ៍ប្រកួត កីឡាការ៉ាតេជើងឯកថ្នាក់ជាតិ ឆ្នាំ២០២៥ ពីថ្ងៃទី ៦ ដល់ថ្ងៃទី ៨ ខែ កុម្ភៈ ឆ្នាំ២០២៦ នាសាលដំបូងទូកនៃសាកលវិទ្យាល័យភូមិន្ទភ្នំពេញ ក្រុមកីឡាការ៉ាតេកងយោធពលខេមរភូមិន្ទ ដណ្ដើមបានមេដាយសរុបច្រើនជាងគេក្នុងចំណោម សមាគម ក្លិប ចូលរួមទាំង ២៧។
ជាលទ្ធផលនោះ គឺក្រុមកីឡាការ៉ាតេ នៃ កងយោធពលខេមរភូមិន្ទ ទទួលបានមេដាយសរុបចំនួន ២៦ គ្រឿងដែលក្នុងនោះមានមេដាយមាសចំនួន ១៦ គ្រឿង មេដាយប្រាក់ចំនួន ៧ គ្រឿង និងមេដាយ សំរឹទ្ធ ៣ គ្រឿង។
ក្នុងពិធីបិទ ឯកឧត្ដម សាមឺឌី ស៊ីវឌ្ឍនា រដ្ឋលេខាធិការ ក្រសួងអប់រំ យុវជន និងកីឡា និងជាអនុប្រធាន សហព័ន្ធកីឡាការ៉ាតេកម្ពុជា តំណាង ឯកឧត្ដម អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រី ក្រសួងសេដ្ឋកិច្ច និង ហិរញ្ញវត្ថុ និងជាប្រធាន សហព័ន្ធកីឡាការ៉ាតេកម្ពុជា បានវាយតម្លៃខ្ពស់ចំពោះការប្រកួតជើងឯកថ្នាក់ជាតិ ឆ្នាំ ២០២៥ នេះទាំងសន្ទុះការចូលរួម និងគុណផលរបស់ កីឡាករ កីឡាការិនី ក៏ដូចជាការខិតខំរៀបចំបានយ៉ាងល្អពីមន្ត្រីបច្ចេកទេសគ្រប់រូប។
ឯកឧត្ដមអនុប្រធាន មានប្រសាសន៍ថា ការរៀបចំព្រឹត្តិការណ៍ប្រកួតនេះ ជាផ្នែកមួយ នៃគោលការណ៍រួមទាំង ០៥ សម្រាប់កំណត់ ទិសដៅទៅអនាគត នៃការអភិវឌ្ឍ កីឡាការ៉ាតេរបស់កម្ពុជា ដែលកើតចេញពីការយកចិត្តទុកដាក់ ខ្ពស់, ឯកភាព, សាមគ្គីភាពផ្ទៃក្នុង, ការចូលរួមប្រកបដោយឆន្ទៈ, និងស្មារតីបុរេសកម្មពីគ្រប់ភាគី ពាក់ព័ន្ធទាំងអស់, ក្រោមការដឹកនាំរបស់ ឯកឧត្តមប្រធាន សហព័ន្ធកីឡាការ៉ាតេកម្ពុជា។
ឯកឧត្ដម សាមឺឌី ស៊ីវឌ្ឍនា ក៏បានរំឭកពីអនុសាសន៍គន្លឹះរបស់ ឯកឧត្ដម អគ្គបណ្ឌិតសភាចារ្យ អូន ព័ន្ធមុនីរ័ត្ន ក្នុងការអភិវឌ្ឍសហព័ន្ធ និងធនធាន កីឡាករ កីឡាការិនី ក៏ដូចជាគ្រូបង្វឹក និង មន្ត្រីបច្ចេកទេសផងដែរ។ ក្រៅពីនេះ ការជំរុញសកម្មភាព កីឡាការ៉ាតេ ដល់មហាជនដើម្បីលើកស្ទួយសុខភាពសាធារណៈ ក៏ត្រូវបានលើកឡើងដូចគ្នា។
បើតាមរបាយការណ៍ពីលោក ដែក ភារៈ អគ្គលេខាធិការរង សហព័ន្ធកីឡាការ៉ាតេកម្ពុជា ការប្រកួតឆ្នាំនេះមានសាលាគុន សមាគម ក្លឹប ចំនួន ២៧ និង កីឡាករចំនួន ១៧៦នាក់ កីឡាការិនីចំនួន ១៥៨នាក់ គ្រូបង្វឹកចំនួន ៥៩នាក់ ប្រតិភូដឹកនាំ ៣១នាក់ មន្ត្រីផ្លូវការចំនួន ២៤នាក់ អាជ្ញាកណ្ដាល ចៅក្រម ចំនួន ១៥នាក់ សរុបចំនួន ៤៦៣នាក់ ។
កាលពីជើងឯកថ្នាក់ជាតិ ឆ្នាំ២០២៤ មានចំនួនតែ ៣៥២ នាក់ប៉ុណ្ណោះ ហេតុដូចនេះ ការចូលរួមការប្រកួតជ្រើសរើសជើងឯក ឆ្នាំ២០២៥នេះ មានការកើនឡើងចំនួន ១១១នាក់។
សម្រាប់វិញ្ញាសាប្រកួតមានចំនួន២ គឺ វិញ្ញាសាកាតា (Kata) និងវិញ្ញាសាប្រយុទ្ធ (Kumite) ដែលចែកចេញជា ៦៦វិញ្ញាសាតូចៗ ហើយបែងចែកតាមកម្រិតអាយុមានចាប់ពី៨ឆ្នាំដល់៣២ឆ្នាំ៕
