ភ្នំពេញ៖ ថ្លែងក្រោយចប់ព្រឹត្តិការណ៍ប្រកួតកីឡាវាយកូនបាល់អន្តរជាតិអាស៊ីវគ្គជម្រុះប្រចាំតបន់អាស៊ីអាយុក្រោម១៤ឆ្នាំ (ITF ASIA 14 & UNDER DEVELOPMENT CHAMOPIONSHIPS 2026-Regional Qualifying Event South, Southeast, & East Asia) នៅទីលានវាយកូនបាល់ពហុកីឡដ្ឋានជាតិមរតកតេជោលោក ទេព រិទ្ធិវិទ្ធ អគ្គលេខាធិការ សហព័ន្ធកីឡាវាយកូនបាល់កម្ពុជា ថាៈក្នុងនាមម្ចាស់ផ្ទះរៀបចំ ការប្រកួតកីឡាវាយកូនបាល់អន្តរជាតិប្រចាំតំបន់វ័យក្រោម១៤ឆ្នាំនេះ យើងពិតជាមានមោទនភាព ដែលមាន១២ប្រទេសចូលរួម ដោយបានបង្ហាញសញ្ញាណដ៏ល្អ។
អនុប្រធានសហព័ន្ធកីឡាវាយកូនបាល់អាស៊ីរូបនេះដ៍ដែរ បានមានប្រសាសន៍ដូច្នះថា៖ នៅក្នុងការប្រកួតអន្តរជាតិនេះ អ្វីដែលជារឿងសំខាន់នោះ គឺកីឡាករ កីឡាការិនីដែលបានចូលរួមប្រកួតបានច្រើន គឺទទួលបានពិន្ទុកាន់តែច្រើន ហើយក្នុងនាមសហព័ន្ធកីឡាវាយកូនបាល់អាស៊ីបានស្នើសុំឱ្យសហព័ន្ធកីឡាវាយកូនបាល់ទាត់អន្តរជាតិ (ITF) ទទួលស្គាល់ពិន្ទុ ដែលទទួលបានក្នុងការប្រកួតកម្រិតអាស៊ីនេះ។
តាមរយៈការបូកពិន្ទុសម្រាប់កម្រិតអន្តរជាតិនេះជាកម្លាំងចិត្តបន្ថែម ក្នុងការជួយជំរុញដល់ទឹកចិត្តកីឡាករ កីឡាការិនីនានាក្នុងអាស៊ី ជាពិសេសកីឡាករ កីឡាការិនីកម្ពុជាឱ្យបន្តកិច្ចខិតខំប្រឹងប្រែងហ្វឹកហាត់ឱ្យកាន់តែខ្លាំងក្លាបន្ថែមទៀត។ លោកលើកឡើងថា សម្រាប់ការហ្វឹកហាត់ ដែលគ្មានការប្រកួត គឺមិនបានដុសខាត់គុណភាពបច្ចេកទេសរបស់កីឡាករ កីឡាការិនីនោះទេ។ ដូច្នេះទោះចាញ់ការប្រកួត ក៏ត្រូវតែប្រកួតឱ្យបានច្រើន ហើយបច្ចេកទេសនឹងឡើងទៅតាមនោះដែរ។
«ចំណុចសំខាន់មួយទៀត សម្រាប់សហព័ន្ធវាយកូនបាល់អាស៊ី ក៏ដូចជាសហព័ន្ធផ្សេងៗទៀត ខ្ញុំចង់ឱ្យមានគ្រូបង្វឹកស្ថិតក្នុងទីលានប្រកួតផ្ទាល់តែម្តង ដោយពីមុនៗ គ្រូបង្វឹកមិនមានសិទ្ធិនៅទីលាន មិនបានគាំទ្រ ឬផ្តល់ព័ត៌មានអ្វីកីឡាករ ឬកីឡាការិនីរបស់ខ្លួននោះទេ នៅពេលកំពុងប្រកួត។ ឥឡូវនេះ ខ្ញុំបានស្នើសុំទៅសហព័ន្ធវាយកូនបាល់អាស៊ីឱ្យមានគ្រូបង្វឹកអាចមានសិទ្ធិឈរនៅលើលានប្រកួតសម្រាប់វ័យអាយុក្រោម១២ឆ្នាំ ដល់ក្រោម១៨ឆ្នាំ ដោយនៅពេលដែលអត្តពលិករបស់ខ្លួនមានកំហុសអាចកែប្រែបានភ្លាមៗ ក្នុងអំឡុងពេលប្រកួត ក្រោយទទួលបានការណែនាំពីគ្រូបង្វឹករបស់ខ្លួនភ្លាមៗ»។ លោក ទេព រិទ្ធិវិទ្ធ បានបន្ថែម។
គួរបញ្ជាក់ថា នេះជាការប្រកួតវគ្គជម្រុះប្រចាំតំបន់ ដើម្បីស្វែងរកក្រុមជ័យលាភី២ប្រទេសឡើងទៅប្រកួតនៅជុំផ្តាច់ព្រ័ត្រ នាឆ្នាំ២០២៧ខាងមុខ។ ជាលទ្ធផល រួមមាន៖ អត្តពលិកវៀតណាម និងហ្វីលីពីនជាក្រុមជ័យលាភីនឹងត្រូវឡើងទៅប្រកួតនៅជុំផ្តាច់ព្រ័ត្រ នៅឆ្នាំ២០២៧ខាងមុខ៕
