ភ្នំពេញ៖ សហព័ន្ធកីឡាអេឡិចត្រូនិកកម្ពុជា (EFC) បានរៀបចំ មហាសន្និបាត បញ្ចប់អាណត្តិទី៣ ឆ្នាំ២០២២-២០២៦ និងបន្តអាណត្តិទី៤ ឆ្នាំ២០២៦-២០៣០ នៅព្រឹកថ្ងៃទី០១ ខែមីនា ឆ្នាំ២០២៦ នៅសាលទីស្តីការក្រសួងព័ត៌មាន ដោយ ឯកឧត្តមបណ្ឌិត ជា ច័ន្ទបរិបូរណ៍ ប្រធានសហព័ន្ធអាណត្តិចាស់ ត្រូវបានទទួលការគាំទ្រពីសមាជិកឱ្យបន្តដឹកនាំអាណត្តិថ្មីនេះ។
ឯកឧត្តមបណ្ឌិត ជា ច័ន្ទបរិបូរណ៍ មានប្រសាសន៍ថា សហព័ន្ធបានប្រឹងប្រែងបន្តការអភិវឌ្ឍកីឡាអេឡិចត្រូនិកកម្ពុជាឱ្យកាន់តែរីកចម្រើនជាជំហានៗ ហើយក្នុងអាណត្តិចាស់កន្លងទៅនេះ ហើយសហព័ន្ធក៏ទទួលបានសមិទ្ធផលជាច្រើន តាមរយៈការអភិវឌ្ឍធនធាន កីឡាករ កីឡាការិនី ក្រុមជម្រើសជាតិកាន់តែច្រើន ជាពិសេសដណ្តើមបានមេដាយយកមកជូនជាតិពីការប្រកួតអន្តរជាតិនានា នាពេលកន្លងមក។
ជាមួយគ្នានេះបន្ទាប់ពី សហព័ន្ធកីឡាអេឡិចត្រូនិកកម្ពុជា បានចុះអនុស្សរណៈជាមួយអាជ្ញាធរគ្រឿងញៀន ឯកឧត្តមបណ្ឌិត ជា ច័ន្ទបរិបូរណ៍ បានជំរុញឱ្យ កីឡាករ កីឡាការិនី E-Sport ទាំងអស់ចូលរួមជួយផ្សព្វផ្សាយអប់រំ ធ្វើជាគំរូក្នុងការជៀសឆ្ងាយពីគ្រឿងញៀន។ កីឡាករ កីឡាការិនី E-Sport ទាំងអស់មានប្រមាណ ៣ម៉ឺននាក់ ហើយបើម្នាក់ៗ នាំគ្នានិយាយពីសារអប់រំផ្សព្វផ្សាយតែ១សារក្នុង១ខែ នោះយើងនឹងបាន៣ម៉ឺនសារ ក្នុងការបញ្ជ្រាបអប់រំផ្សព្វផ្សាយ អំពីគ្រោះថ្នាក់នៃការប្រើប្រាស់គ្រឿងញៀន។
ដូច្នេះ កីឡាករ កីឡាការិនីអេឡិចត្រូនិកកម្ពុជា មានសក្តានុពលខ្លាំងណាស់ ក្នុងការបញ្ជ្រាបការផ្សព្វផ្សាយសារ អប់រំពីគ្រោះថ្នាក់ នៃការប្រើប្រាស់គ្រឿងញៀន នៅលើប្រព័ន្ធអនឡាញ ដោយ ឯកឧត្តមបណ្ឌិត ជំរុញឱ្យ កីឡាករ កីឡាការិនីទាំងអស់ រួបរួមគ្នាអប់រំផ្សព្វផ្សាយឱ្យបានគ្រប់ៗគ្នា ហើយក៏ត្រូវជៀសឆ្ងាយអំពីការប្រើប្រាស់សារធាតុហាមឃាត់ក្នុងវិស័យកីឡាផងដែរ។
សូមបញ្ជាក់ផងដែរថា សម្រាប់សមាសភាព គណៈកម្មាធិការប្រតិបត្តិ EFC អាណត្តិថ្មី ២០២៦-២០២៣ មានចំនួន៩ រូប ឯកឧត្តមបណ្ឌិត ជា ច័ន្ទបរិបូរណ៍ ជាប្រធាន លោក ជី សិលា អនុប្រធាន ឯកឧត្តម លន់ សាមឌី អគ្គលេខាធិការ អមដោយ អគ្គលេខាធិការរង ២ រូប គឺលោក ជាន ចាន់រ៉ា និងលោក វ៉ាន់ សំបូរ ព្រមទាំងសមាជិក ៤ រូបទៀត។ អង្គមហាសន្និបាតបានអញ្ជើញចូលរួមជាសក្តីភាពពី ឯកឧត្តម ណយ ផាណា តំណាង គណៈកម្មាធិការជាតិអូឡាំពិកកម្ពុជា និងតំណាង ក្រសួងអប់រំ យុវជន និងកីឡាផងដែរ៕
