លោក សែម ផល្លា នាយកគ្រប់គ្រងកម្មវិធីម៉ារ៉ាតុងនៅកម្ពុជា មានប្រសាសន៍ថា ថិរវេលារបស់ម្ចាស់ ជ័យលាភី ពីលេខ១ដល់លេខ៣នៃព្រឹត្តិការណ៍ពាក់កណ្ដាលម៉ារ៉ាតុងអន្តរជាតិនៅខេត្តព្រះសីហនុនឹងត្រូវកត់ត្រា និងបង្ហាញក្នុងកំណត់ត្រាអង្គការម៉ារ៉ាតុងពិភពលោក។
អ្នកជំនាញខាងលើសង្កត់ធ្ងន់ថា នេះជាព្រឹត្តិការណ៍ស្តង់ដាអន្តរជាតិ។ ដូច្នេះថិរវេលារបស់ម្ចាស់ជ័យលាភី ពីលេខ១ដល់លេខ៣នឹងត្រូវបានផ្សព្វផ្សាយទៅកាន់ពិភពលោក។ ទន្ទឹមនឹងនេះអ្នកជំនាញម៉ារ៉ាតុងពិភពលោកក៏នឹងចូលរួមវាស់វែងផ្លូវនិងតាមដានការប្រកួតផងដែរ។
សូមជម្រាបជូនថា ទិវារត់ប្រណាំងអន្ដរជាតិពាក់កណ្ដាលម៉ារ៉ាតុង លើកទី១១ នៅខេត្តព្រះសីហនុ នឹងប្រព្រឹត្តទៅនៅថ្ងៃអាទិត្យ ទី២២ ខែមីនា ឆ្នាំ២០២៦ ខាងមុខ។
លោក សែម ផល្លា បានឱ្យដឹងដែរថាគិតមកទល់ពេលនេះ មានអ្នកចុះឈ្មោះប្រមាណ ២ពាន់នាក់ហើយ និងមកពីជិត ៤០ប្រទេស។ ប៉ុន្ដែការចុះឈ្មោះនឹងនៅតែបន្ដរហូតដល់ថ្ងៃកម្មវិធី។
ឯកឧត្ដម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា បានថ្លែងថា ព្រឹត្តិការណ៍ឆ្នាំនេះ នឹងមានការកែសម្រួលផ្លូវរត់មួយចំនួន ដោយពង្រីកតម្រាយផ្លូវរត់តាមឆ្នេរកាន់តែវែង ឱ្យអត្តពលិកចូលរួម ទទួលបាននូវខ្យល់អាកាសបរិសុទ្ធ ហើយរីករាយជាមួយទេសភាពឆ្នេរ និងសមុទ្រដ៏ស្រស់ស្អាត ក៏ដូចជាបញ្ចៀសផលប៉ះពាល់ចរាចរណ៍ក្នុងក្រុងផងដែរ។
ការកែសម្រួលតម្រាយផ្លូវរត់ថ្មី គឺដើម្បីតភ្ជាប់ជាមួយហេដ្ឋារចនាសម្ព័ន្ធជាច្រើននៅតំបន់ឆ្នេរ រហូតដល់រង្វង់មូលព្រះថោងនាងនាគ ដែលត្រូវរត់ឡើងចុះភ្នំ។
ចំពោះគោលបំណងសំខាន់ៗនៃការរៀបចំព្រឹត្តិការណ៍រត់ប្រណាំងតាមឆ្នេរនេះ គឺរត់ដើម្បីលើកកម្ពស់ការថែរក្សាបរិស្ថានតំបន់ឆ្នេរ ក្នុងនាមសមាជិកក្លិបឆ្នេរស្អាតជាងគេលើពិភពលោក។ ទន្ទឹមនឹងនេះ ក៏មានការកៀគរថវិកាបានពីការរៀបចំ បរិច្ចាគជួយដល់មន្ទីរពេទ្យកុមារ និងអង្គការដៃគូមួយចំនួនទៀតផងដែរ។
ជាមួយគ្នានេះ គណៈកម្មការរៀបចំបានអនុញ្ញាតឱ្យកីឡាករ-កីឡាការិនីអត្តពលកម្មជម្រើសជាតិ ក្នុងការចុះឈ្មោះចូលរួមដោយឥតគិតថ្លៃ៕
