ភ្នំពេញ៖ ព្រឹត្តិការណ៍ប្រកួតកីឡាប៉េតង់បើកទូលាយ (Petanque Open) ជាការប្រកួតរៀបចំឡើងដើម្បីចូលរួមអបអរដល់ទិវាអន្តរជាតិនារី លើកទី១១៥ ដែលទើបបញ្ចប់ទៅកាលពីថ្ងៃទី៨ មីនា កន្លងទៅ ត្រូវបាន ឯកឧត្តម ប៉ុន សុខ អគ្គនាយក នៃ អគ្គនាយកដ្ឋានកីឡា នៃក្រសួងអប់រំ យុវជន និងកីឡា ចាត់ទុកជា ព្រឹត្តិការណ៍ប្រកួតជួយបង្កើនឱកាសឱ្យ កីឡាករ-កីឡាការិនី និយមលេង កីឡាប៉េតង់ ពីគ្រប់ទិសទី នៃប្រទេសកម្ពុជា មកជួបជុំគ្នាប្រកួតប្រជែង ផ្លាស់ប្តូរបទពិសោធ និងការពង្រឹងនូវកម្រិតសមត្ថភាពឱ្យកាន់តែខ្លាំងឡើងបន្ថែមទៀត។
ការប្រកួតកីឡាប៉េតង់បើកទូលាយនេះ រៀបចំឡើងក្រោមកិច្ចសហការ រវាង អគ្គនាយកដ្ឋានកីឡា សហភាពសហព័ន្ធយុវជនកម្ពុជា (ស ស យ ក) រាជធានីភ្នំពេញ ក្លិបកីឡាប៊ូល និងប៉េតង់ ប៊ី អូ អេស និងក្រុមហ៊ុនឯកជន ជាដៃគូឧបត្ថម្ភ។ ការប្រកួតដដែលនេះ បានរៀបចំឡើងនៅទីលានកីឡាប៉េតង់ ក្នុងពហុកីឡដ្ឋានជាតិអូឡាំពិក។
ឯកឧត្តម បានមានប្រសាសន៍បែបនេះថា៖ ការបង្កើតឱ្យមានការប្រកួតនេះឡើង បានជួយអូសទាញឱ្យពលរដ្ឋគ្រប់វណ្ណៈងាកមកចូលរួមលេងកីឡាប៉េតង់ ក៏ដូចជាការចាប់អារម្មណ៍លេងកីឡាដទៃទៀតនៅក្នុងជីវិតប្រចាំថ្ងៃ ហើយថែមទាំងបានជួយផ្សព្វផ្សាយ អំពីប្រភេទកីឡាប៉េតង់នេះ ឱ្យមានសន្ទុះគាំទ្រកាន់តែខ្លាំងឡើងមួយកម្រិតទៀត។
លើសពីនេះទៀត ការបង្កើតឱ្យមានការប្រកួតនេះ ក៏បានជួយពង្រីកដល់ វិសាលភាពការប្រកួតកីឡាប៉េតង់ ឱ្យកាន់តែផុសផុលឡើងមួយកម្រិតទៀត ក្នុងការផ្តល់ឱកាសដល់អ្នកស្នេហាវិស័យកីឡាប៉េតង់ អាចចូលរួមប្រកួតកម្រិតពានរង្វាន់បាន។
សូមបញ្ជាក់ផងដែរថា៖ ការប្រកួតដែលរៀបចំឡើងត្រឹមរយៈពេលតែ ១ថ្ងៃ ជាលទ្ធផល ក្លិបកីឡាប៊ូល និងប៉េតង់ គ្លីនិកធ្មេញ កែវ គីមសៀ ដណ្តើមបានចំណាត់ថ្នាក់លេខ ១, លេខ ២ បានលើក្រុមកីឡាប៉េតង់ B52 និងលេខ ៣ បានលើក្រុមកីឡាប៊ូល និងប៉េតង់ ខេត្តកំពង់ឆ្នាំង ហើយលេខ ៤ ក្រុមកីឡាប៊ូល និងប៉េតង់ ប៊ី អូ អេស ក្រុមទី១៕
