ខេមរៈសហព័ន្ធកីឡាតេក្វាន់ដូ WT នឹងបញ្ជូនគ្រូបង្វឹក និងអត្តពលិក របស់ខ្លួនចំនួន៥រូប ចេញទៅប្រកួតក្នុងព្រឹត្តិការណ៍ The 27th Asian Taekwondo Championships 2026 នៅប្រទេសម៉ុងហ្គោលី នាដើមសប្ដាហ៍ក្រោយនេះពីថ្ងៃទី១៩ដល់ថ្ងៃទី២៦ ខែឧសភា។
នេះជាការប្រកួត Qualify ដើម្បីទទួលបានសិទ្ធទៅចូលរួមប្រកួតក្នុងព្រឹត្តិការណ៍ Asian Games នៅប្រទេសជប៉ុន ចុងឆ្នាំ ២០២៦។
សមាជិកទាំង៥រូបមានលោកគ្រូបង្វឹក Choi YongSok ដឹកនាំកូនក្រុម៤រូប គឺកីឡាករ សំ យូដេត ទម្ងន់-៥៨គីឡូក្រាម កីឡាករ វ៉ា មិថុនា ទម្ងន់-៨០គីឡូក្រាម កីឡាការិនី គ្រី លីដែន ទម្ងន់-៤៩គីឡូក្រាម និង កីឡាការិនី ម៉ម ជូលី ទម្ងន់-៥៧គីឡូក្រាម។
នេះជាលើកដំបូងហើយដែលកីឡាតេក្វាន់ដូ WT កម្ពុជាត្រូវឆ្លងកាត់វគ្គជម្រុះជាមុនសិនដើម្បីទទួលបានកៅអីទៅព្រឹត្តិការណ៍ធំ។ ហេតុដូចនេះហើយបានជាកីឡាករកីឡាការិនីទាំង៤ខាងលើអះអាងនឹងមានភាពតានតឹងខ្លាំង ប៉ុន្តែពួកគេក៏នឹងប្រឹងប្រែងអស់ពីសមត្ថភាពដើម្បីឈានទៅព្រឹត្តិការណ៍កីឡាអាស៊ីនៅប្រទេសជប៉ុន។
គួរដឹងដែរថា កម្ពុជាបានគ្រោងជាបណ្ដោះអាសន្ននូវប្រភេទកីឡាចំនួន១១ គឺហែលទឹក អត្តពលកម្ម ប្រដាល់សកល ជឺជីតស៊ូ យូដូ ការ៉ាតេ តេក្វាន់ដូ WT ទ្រីយ៉ាត្លុង ចំបាប់ កីឡាអេឡិចត្រូនិក និង បាល់ទាត់លើតុ សម្រាប់ការចូលរួមប្រកួតប្រជែងក្នុងព្រឹត្តិការណ៍កីឡាអាស៊ី ឆ្នាំ២០២៦។
ក្នុងចំណោម១១ប្រភេទកីឡាខាងលើ គឺមានកីឡាតេក្វាន់ដូ WT និងកីឡាអេឡិចត្រូនិកដែលត្រូវឆ្លងកាត់វគ្គជម្រុះ (qualify) ជាមុនសិន ដើម្បីប្រជែងកៅអីទៅកាន់ព្រឹត្តិការណ៍ផ្លូវការនៅប្រទេសជប៉ុន។
សូមជម្រាបជូនថា ព្រឹត្តិការណ៍កីឡាអាស៊ី ឆ្នាំ២០២៦ នៅ Aichi-Nagoya ប្រទេសជប៉ុន គ្រោងប្រព្រឹត្តទៅពីថ្ងៃទី១៩ ខែកញ្ញា ឆ្នាំដល់ថ្ងៃទី៤ ខែតុលា ឆ្នាំ២០២៦។ ក្នុងនោះ គេរំពឹងថា នឹងមានការចូលរួមពី៤៦ប្រទេស ប្រកួតប្រជែងលើ៤៣ប្រភេទកីឡា៕
