ក្លិបបាល់ទាត់ព្រះខ័នរាជស្វាយរៀង របស់កម្ពុជា នឹងត្រូវជួបប្រកួតវគ្គផ្ដាច់ព្រ័ត្រ នៃពានរង្វាន់ AFC Challenge League(ACGL) 2025/26 ទល់នឹងក្រុមម្ចាស់ផ្ទះ Al-Kuwait SC របស់រដ្ឋកូវ៉ែត នៅរាត្រីថ្ងៃទី១៣ ខែឧសភា ឆ្នាំ២០២៦ នេះ វេលាម៉ោង ១១:៤៥ នាទីយប់ (ម៉ោងនៅកម្ពុជា) នៅពហុកីឡដ្ឋានជាតិកូវ៉ែត Jaber Al Ahmad International។
នេះគឺជាប្រវត្តិសាស្ដ្រថ្មីមួយទៀត ដែលក្លិបបាល់ទាត់កម្ពុជា បានឡើងវគ្គផ្ដាច់ព្រ័ត្រ ២រដូវកាលជាប់គ្នា ក្នុងពានរង្វាន់កម្រិតទី៣ ទ្វីបអាស៊ីនេះ ខណៈលោក McConkey Matthew គ្រូបង្វឹកព្រះខ័នរាជស្វាយរៀង បានបង្ហាញពីការត្រៀមខ្លួនរួចរាល់សម្រាប់ការប្រកួតដ៏សំខាន់នេះ ស្របពេលកីឡាករ ក៏កំពុងស្រេកឃ្លាននូវជ័យជម្នះ ដើម្បីបង្កើតកំណត់ត្រាថ្មីជូនក្លិប និងប្រទេសជាតិផងដែរ។
លោក McConkey បានបង្ហាញសុទិដ្ឋិនិយម ក្នុងសន្និសីទសារព័ត៌មាន មុនការប្រកួតថា ក្រុមទាំងមូល ត្រៀមខ្លួនបានយ៉ាងល្អ បន្ទាប់ពីធ្វើដំណើរដល់រដ្ឋកូវ៉ែតច្រើនថ្ងៃមុនការប្រកួត។ ផ្អែកលើស្មារតីក្រុម ដែលបានត្រៀមខ្លួនរួចរាល់នេះ ព្រះខ័នរាជស្វាយរៀង នឹងប្រើប្រាស់បទពិសោធន៍ខ្លួនកាលពីឆ្នាំមុន ដើម្បីតតាំងជាមួយក្រុមខ្លាំងរបស់កូវ៉ែត ហើយលោករំពឹងថា ក្រុមខ្លួននឹងអាចផ្ដល់នូវបញ្ហា ដែល Kuwait SC មិនធ្លាប់ជួបប្រទះពីមុនមកក្នុងការប្រកួតនេះ។
រីឯកីឡាករ សឿយ វិសាល ក្នុងប្រធានក្រុមជើងឯកលីគកំពូលកម្ពុជានេះ ក៏បានបង្ហាញនូវទំនុកចិត្តយ៉ាងមុតមាំដែលថា «យើងធ្លាប់ឡើងវគ្គនេះម្ដងហើយ កាលពីឆ្នាំមុន យើងបានរងជើងឯក តែឆ្នាំនេះ ពួកយើងនឹងខិតខំប្រឹងប្រែង ដើម្បីឈ្នះការប្រកួត និងបង្កើតកំណត់ត្រាជាមួយក្រុម និងប្រទេសរបស់យើង។ យើងដឹងហើយថា ឆ្នាំនេះ កីឡាកររបស់យើង សុទ្ធតែមានគុណភាព ហើយពួកគេមកទីនេះ គឺស្រែកឃ្លាននឹងការនាំយកពានត្រឡប់ទៅមាតិភូមិវិញ»។
លើសពីការប្រកួត ក្នុងនាមក្លិបតំណាងប្រទេស ព្រះខ័នរាជស្វាយរៀង កំពុងទទួលបានការគាំទ្រ និងលើកទឹកចិត្តយ៉ាងផុសផុសពីថ្នាក់ដឹកនាំ ក្លិបសមាជិកលីគកំពូលកម្ពុជា ក៏ដូចជាអ្នកគាំទ្រទូទាំងប្រទេស។ ទោះបីការប្រកួតធ្វើឡើងនៅតំបន់មជ្ឈឹមបូព៌ា តែតាមរយៈការគាំទ្រក្រោមស្មារតី និងមោទនភាពជាតិតែមួយ គេសង្ឃឹមថា ព្រះខ័នរាជស្វាយរៀង នឹងព្យាយាមអស់ពីសមត្ថភាព និងទទួលបានជោគជ័យ ក្នុងការនាំពានរង្វាន់អន្ដរជាតិលើកដំបូងជូនជាតិមាតុភូមិ៕
