លោក នូ ចំរើន អគ្គលេខាធិការសហព័ន្ធកីឡាទោចក្រយានកម្ពុជាបានអំពាវនាវបណ្តាក្រុមហ៊ុនចូលរួមឧបត្ថម្ភគាំទ្រទាំងថវិកានិងសម្ភារៈនានា ជួយដល់ក្រុមអ្នកជិះកង់ក្នុងយុទ្ធនាការជិះពីរាជធានីភ្នំពេញទៅខេត្តសៀមរាបដើម្បីស្វែងរកមូលនិធិជួយមន្ទីរពេទ្យកុមារអង្គរ។
ថ្នាក់ដឹកនាំសហព័ន្ធកីឡាទោចក្រយានជាតិថ្លែងបែបនេះ ខណៈសហព័ន្ធកីឡាទោចក្រយានកម្ពុជានឹងរៀបចំព្រឹត្តិការណ៍ជិះកង់ដើម្បីកុមារកម្ពុជាជាលើកទី៣ ដើម្បីប្រមូលមូនិធិជួយដល់មន្ទីរពេទ្យកុមារអង្គរនៅខេត្តសៀមរាប នៅថ្ងៃទី៣០ ខែឧសភា ខាងមុខ។
តាមគម្រោង មានអ្នកជិះកង់ចូលរួមចំនួន១២២នាក់ ហើយក៏មានអ្នកចូលរួមជិះអមជាង៤០០នាក់តាមបណ្តារាជធានីខេត្តដែលក្រុមកង់ជិះឆ្លងកាត់។ ទន្ទឹមនឹងនេះអ្នកជិះកង់ជាបរទេសមកពី៩ប្រទេសផ្សេងគ្នាក៏នឹងចូលរួមផងដែរ។
លោក នូ ចំរើន បន្ថែមដែរថា ព្រឹត្តិការណ៍នេះមិនត្រឹមតែរួមចំណែកជួយដល់មន្ទីរពេទ្យកុមារអង្គរប៉ុណ្ណោះទេ តែក៏ជាការចូលរួមចំណែកក្នុងការផ្សព្វផ្សាយចលនាទេសចរណ៍តំបន់អង្គរទៅកាន់អន្តរជាតិ ព្រោះមានអ្នកជិះកង់ជាជនបរទេសចូលរួមទៀតផង៕
