កីឡាការិនី វី ស្រីស្រស់ ទទួលបានឱកាសបង្ហាញខ្លួនក្នុងការប្រកួតកម្មវិធីប្រដាល់សកលប្រចាំខែ Dragon the Golden Ring ជាលើកដំបូង នៅថ្ងៃសុក្រ ទី២៩ ខែឧសភា ឆ្នាំ២០២៦ នាសាលកីឡាប្រដាល់សកលនៃពហុកីឡដ្ឋានជាតិអូឡាំពិក ដោយត្រូវតតាំងកីឡាការិនីបរទេស។
កីឡាការិនីឆ្នើមជម្រើសជាតិកម្ពុជាសង្កត់ធ្ងន់ថា នេះជាឱកាសដ៏ល្អ និងជាការត្រៀមយ៉ាងសំខាន់សម្រាប់ការប្រកួតនៅក្រៅប្រទេសនាពេលខាងមុខ ព្រោះកន្លងមកមិនសូវបានប្រកួតឡើយ ជាពិសេសខកខានតាំងពីការប្រកួតជើងឯកថ្នាក់ជាតិ តាំងពីខែធ្នូ ឆ្នាំ២០២៥។
ម្ចាស់មេដាយមាសជើងឯកថ្នាក់ជាតិសប្បាយចិត្តដែលត្រូវបានផ្ដល់ឱកាសប្រកួតកម្មវិធី Dragon the Golden Ring និងបានហ្វឹកហាត់ត្រៀមយ៉ាងល្អ តែប្រសិនបើបានប្រកួតញឹកញាប់ក៏អាចធ្វើឱ្យបានដឹងពីសមត្ថភាព ល្អប្រសើរជាងការត្រឹមតែហ្វឹកហាត់មួយមុខ។
'ជុំវិញការប្រកួតជាលក្ខណៈអន្តរជាតិនេះ ម្ចាស់មេដាយសំរឹទ្ធស៊ីហ្គេម ២០២៣ ដដែលអះអាងថា មិនចោទជាបញ្ហាឡើយ ព្រោះកន្លងមកក៏ធ្លាប់ប៉ះកីឡាការិនីបរទេសច្រើនដែរ តែមិនមែនការប្រកួតក្នុងប្រទេស។ នាងថា នឹងព្យាយាមអស់ពីសមត្ថភាពដើម្បីជ័យជម្នះ។
បើតាមគម្រោង លើសង្វៀនកម្មវិធី Dragon the Golden Ring ក្នុងថ្ងៃតែមួយ បងប្រុសរបស់កីឡាការិនី វី ស្រីស្រស់ គឺកីឡាករ វី សុភ័ស្ស នឹងត្រូវប្រកួតតទល់កីឡាករបរទេស បូករួមទាំងការប្រកួតកម្រិតថ្នាលពិសេសៗជាច្រើនគូទៀត ហើយការប្រកួតនឹងចាប់ផ្ដើមពីម៉ោង៦ល្ងាចតទៅ៕
