កីឡាករប្រដាល់សកលជម្រើសជាតិកម្ពុជា Anvar Nasredinov បានត្រៀមខ្លួនរួចជាស្រេចហើយសម្រាប់ការប្រកួតលើកដំបូងរបស់ខ្លួនក្នុងកម្មវិធីកីឡាប្រដាល់សកលប្រចាំខែ Dragon the Golden Ring នៅថ្ងៃសុក្រ ទី២៩ ខែឧសភា ឆ្នាំ២០២៦ ខាងមុខ។
ម្ចាស់មេដាយសំរឹទ្ធស៊ីហ្គេម ២០២៣ សង្កត់ធ្ងន់ថា នេះជាការប្រកួតដ៏ល្អមួយសម្រាប់ខ្លួនដើម្បីត្រៀមចូលរួមព្រឹត្តិការណ៍អន្តរជាតិនាពេលខាងមុខ ដូចជា World Cup ក្នុងខែមិថុនា នៅប្រទេសចិន និងការត្រៀមទៅ Asian Games 2026 នៅប្រទេសជប៉ុន ក្នុងខែកញ្ញា។ ដូច្នេះគេបានប្រឹងប្រែងហ្វឹកហាត់ និងត្រៀមខ្លួនយ៉ាងល្អសម្រាប់ការប្រកួតចុងសប្ដាហ៍នេះ។
អ្នកប្រដាល់កូនកាត់អ៊ូបេគីស្ថានដដែលនឹងត្រូវប៉ះកីឡាករសញ្ជាតិអង់ហ្គោឡា Deizon Sapalo ក្នុងប្រភេទទម្ងន់៨៥គីឡូក្រាម។ គេបានអំពាវនាវដល់អ្នកគាំទ្រចូលរួមទស្សនា និងលើកទឹកចិត្តដល់រូបគេ ក៏ដូចជាដល់មិត្តរួមជាតិឱ្យបានច្រើន ហើយគេប្ដេជ្ញានឹងយកជ័យជម្នះឱ្យបាន។
ជុំវិញការប្រកួតកីឡាប្រដាល់សកលកម្ពុជានេះដែរ Anvar សង្ឃឹមថា នឹងមានអ្នកចូលរួមឧបត្ថម្ភគាំទ្រកាន់តែច្រើនថែមទៀត និងបង្កើតបានកម្មវីធីជាបន្តបន្ទាប់ ដើម្បីផ្ដល់ឱកាសដល់កីឡាករ កីឡាការិនីកម្ពុជាបានប្រកួតបង្កើតសមត្ថភាព។
សូមជម្រាបជូនថា កម្មវិធីកីឡាប្រដាល់សកលប្រចាំខែ Dragon the Golden Ring សម្រាប់ខែឧសភា នៅថ្ងៃសុក្រ សប្ដាហ៍នេះនឹងចាប់ផ្ដើមពីម៉ោង៦ល្ងាចតទៅនៅសាលកីឡាប្រដាល់សកលនៃពហុកីឡដ្ឋានជាតិ ដោយមានគូពិសេសៗយ៉ាងច្រើន៕
