នៅក្នុងកិច្ចប្រជុំកំពូល Global Citizen NOW តារាចម្រៀង Shakira បានប្រកាសថា នឹងបរិច្ចាគ១០០ភាគរយនៃប្រាក់ចំណូលពីបទចម្រៀង 'Dai Dai' របស់នាងទៅមូលនិធិអប់រំពលរដ្ឋសកលរបស់សហព័ន្ធកីឡាបាល់ទាត់ពិភពលោក (FIFA)។
មូលនិធិនេះមានគោលបំណងរៃអង្គាសប្រាក់ចំនួន១០០លានដុល្លារនៅចុងព្រឹត្តិការណ៍បាល់ទាត់ពិភពលោកឆ្នាំ ២០២៦ ដើម្បីផ្តល់ការអប់រំ និងឱកាសបាល់ទាត់ដែលមានគុណភាពសម្រាប់កុមារទូទាំងពិភពលោក។
"បទ 'Dai Dai' គឺលើសពីបទចម្រៀងព្រឹត្តិការណ៍បាល់ទាត់ពិភពលោក។ វាជាសារសម្រាប់កុមារគ្រប់រូបដែលធ្លាប់ត្រូវបានគេប្រាប់ថាក្តីសុបិនរបស់ពួកគេធំខ្លាំងពេក។ ហើយបទចម្រៀងនេះក៏ជាកិត្តិយសដល់វីរបុរសបាល់ទាត់ដូចជា Pelé, Ronaldo, Messi ផងដែរ។ យើងត្រូវរំឭកថា ម្ចាស់ជើងឯកគ្រប់រូបបានចាប់ផ្តើមតាំងពីកុមារភាព បានតស៊ូ ប៉ុន្តែមិនបោះបង់ចោលឡើយ។ ហើយវាត្រូវការជម្រកមួយដើម្បីចិញ្ចឹមកូន ផ្តល់ឱ្យកូនៗរបស់យើងនូវឱកាសដែលពួកគេសមនឹងទទួលបាន ហើយឱកាសនោះជាឱកាសដ៏មានតម្លៃបំផុតដែលយើងអាចផ្តល់ជូននៅថ្ងៃនេះគឺការអប់រំ"។ នេះជាការថ្លែងរបស់ Shakira។
«Dai Dai» ដែលជាការលាយបញ្ចូលគ្នារវាងតន្ត្រីប៉ុបឡាទីន និង Afrobeats ដោយ Shakira និង Burna Boy ត្រូវបានចេញផ្សាយជាបទចម្រៀងផ្លូវការរបស់ FIFA World Cup 2026។
ព្រឹត្តិការណ៍ FIFA World Cup 2026 នឹងប្រព្រឹត្តទៅពីថ្ងៃ១១ ខែមិថុនា ដល់ថ្ងៃទី១៩ ខែកក្កដា ឆ្នាំ២០២៦ ដោយមានសហរដ្ឋអាមេរិក កាណាដា និង ម៉ិកស៊ីកូ ជាសហម្ចាស់ផ្ទះ និងមានក្រុមជម្រើសជាតិចំនួន៤៨មកពី៦ទ្វីបចូលរួម៕
