ពន្លកកីឡាយូដូវ័យក្មេង យុត បញ្ញាសាមែន បានចូលហ្វឹកហាត់កីឡាប្រយុទ្ធមួយនេះរយៈពេល៣ឆ្នាំមកហើយ ដោយចង់ដើរតាមគន្លងម្ដាយមីងរបស់ខ្លួន គឺកញ្ញា ហេង លីលី ដែលជាម្ចាស់មេដាយសំរឹទ្ធស៊ីហ្គេម២០២៣ និងជាគ្រូបង្វឹកថ្នាលកីឡាយូដូជម្រើសជាតិ។
មិនធ្លាប់បានហ្វឹកហាត់កីឡាណាពីមុនមកសោះ ការឈានជើងចូលកីឡាយូដូនេះពិតជាលំបាកសម្រាប់យុវតីវ័យ១៤ឆ្នាំរូបនេះ ជាពិសេសការហ្វឹកហាត់ខ្លាំងៗ តែការខិតខំប្រឹងប្រែងអត់ធ្មត់ ប៉ុន្មានខែក្រោយមក បានធ្វើឱ្យនាងអាចសម្របខ្លួនបានល្អ។ សាមែន ប្រាប់ថា ការហ្វឹកហាត់កីឡាយូដូនេះទទួលបានការគាំទ្រយ៉ាងខ្លាំងពីឪពុកម្ដាយ ព្រោះអាចផ្ដល់នូវសុខភាពល្អ រាងកាយមាំមួន និងចោលទម្លាប់មិនល្អមួយចំនួន ដូចជាការចំណាយពេលច្រើនលើការលេងទូរសព្ទ ជាដើម។
ក្នុងរយៈពេល៣ឆ្នាំមកនេះ យុត បញ្ញាសាមែន ធ្លាប់បានឈ្នះមេដាយមាសកីឡាយូដូថ្នាក់ជាតិចំនួន៣ដងជាប់គ្នាតែម្ដង គឺ ឆ្នាំ២០២៣ ២០២៤ និង ២០២៥។ យុវតីមានកំណើតនៅរាជធានីភ្នំពេញបង្ហើបថា ក្ដីស្រមៃរបស់ខ្លួន គឺចង់ឈ្នះមេដាយមាសកីឡាយូដូប្រចាំព្រឹត្តិការណ៍កីឡាស៊ីហ្គេម និងឈានទៅប្រកួតព្រឹត្តិការណ៍កីឡាអូឡាំពិកសម្រាប់ជាតិមាតុភូមិ។
យុត បញ្ញាសាមែន ត្រូវបានខេមរៈសហព័ន្ធយូដូជ្រើសរើសជាបេក្ខភាពសម្រាប់ការជម្រុះយកសិទ្ធិពេញលេញទៅចូលរួមព្រឹត្តិការណ៍កីឡាអូឡាំពិក នៅ Los Angeles សហរដ្ឋអាមេរិក ឆ្នាំ២០២៨។ សិស្សថ្នាក់ទី៨រូបនេះទទួលស្គាល់ពីការលំបាកក្នុងដំណើរឆ្ពោះទៅកាន់ព្រឹត្តិការណ៍កីឡាចម្រុះដ៏ធំជាងគេបង្អស់លើលោកនេះ ព្រោះមានអ្នកខ្លាំងៗច្រើនដែលត្រូវប្រឈម។ ប៉ុន្តែនាងអះអាងថា នឹងប្រឹងប្រែងអស់ពីសមត្ថភាពដើម្បីសម្រេចឱ្យបាននូវក្ដីស្រមៃធំធេងមួយនេះ។
ទន្ទឹមនឹងនេះ សាមែន បានលើកទឹកចិត្តដល់យុវជនចូលរួមលេងកីឡាឱ្យបានច្រើនដើម្បីទទួលបានសុខភាព និងអាចក្លាយជាអ្នកកីឡាដ៏ឆ្នើមជួយយកកិត្តិយសជូនប្រទេសជាតិ។
សូមជម្រាបជូនថា កីឡាការិនីវ័យក្មេង យុត បញ្ញាសាមែន ក៏នឹងចូលរួមទិវាអូឡាំពិក និង វេទិកាអត្តពលិកជាតិ នៅថ្ងៃអាទិត្យ ទី២៨ ខែមិថុនា ឆ្នាំ២០២៦ នាពហុកីឡដ្ឋានជាតិមរតកតេជោ៕
