អស់រយៈពេលជិតមួយឆ្នាំមកហើយដែល កុមារី ស៊ីឡាន ជាសិស្សថ្នាក់ទី៤ នៃសាលាបឋមសិក្សាព្រះនរោត្តម បានចំណាយពេលវេលាក្រោយការសិក្សា ដើម្បីមកហ្វឹកហាត់កីឡាប្រដាល់សកលយ៉ាងសកម្ម នៅពហុកីឡដ្ឋានជាតិអូឡាំពិកជា។
ការឈានជើងចូលក្នុងវិស័យក្បាច់គុននេះ កើតចេញពីការគាំទ្រ និងជំរុញយ៉ាងពេញទំហឹងពីអ្នកម្តាយ ក្នុងគោលបំណងចង់ឱ្យកូនស្រីមានសុខភាពល្អ រាងកាយរឹងមាំ និងមានចំណេះដឹងផ្នែកការពារខ្លួន។ ទោះបីជាការចាប់ផ្តើមដំបូងពោរពេញដោយភាពលំបាក ហត់នឿយ និងត្រូវចំណាយពេលជាងមួយខែទើបអាចស៊ាំនឹងការហ្វឹកហាត់ដ៏លំបាកបែបនេះក៏ដោយ ប៉ុន្តែកុមារីចិត្តស៊ូរូបនេះមិនដែលរអ៊ូរទាំ ឬគិតពីពាក្យថាបោះបង់នោះឡើយ។
“ការតស៊ូមិនខកបំណងឡើយ” ជាផ្លែផ្កានៃការខិតខំប្រឹងប្រែង គឺចុងខែកក្កដានេះ ស៊ីឡាន នឹងត្រូវឡើងបង្ហាញសមត្ថភាពលើសង្វៀនជាផ្លូវការលើកដំបូង ក្នុងកម្មវិធីប្រកួតប្រចាំខែ Dragon the Golden Ring។ សម្រាប់ការប្រកួតលើកដំបូងនេះ កុមារីដដែលបានប្តេជ្ញាចិត្តយ៉ាងមុតមាំថានឹងប្រឹងប្រែងអស់ពីលទ្ធភាព ដើម្បីដណ្តើមយកជ័យជម្នះជូនគ្រួសារ និងគ្រូបង្វឹក។
គោលដៅវែងឆ្ងាយ និងធំបំផុតរបស់ ស៊ីឡាន មិនមែនត្រឹមតែការប្រកួតលក្ខណៈមិត្តភាពនោះទេ ប៉ុន្តែគឺការអភិវឌ្ឍសមត្ថភាពខ្លួនឯងឱ្យក្លាយជាកីឡាការិនីឆ្នើម ដើម្បីមានឱកាសឈានជើងចូលក្នុងក្រុមជម្រើសជាតិ នាំយកកិត្តិយសជូនប្រទេសជាតិនាពេលអនាគត៕
