ឯកឧត្តមបណ្ឌិត ថោង ខុន ទេសរដ្ឋមន្ត្រី និងជាប្រធានគណៈកម្មាធិការជាតិអូឡាំពិកកម្ពុជា បានជួបពិភាក្សាការងារជាមួយអ្នកឧកញ៉ា សំអាង វឌ្ឍនៈ អគ្គនាយកក្រុមហ៊ុន វឌ្ឍនៈ ហ្គោល រីហ្សត អំពីការត្រៀមរៀបចំព្រឹត្តិការណ៍កីឡាវាយកូនហ្គោលអន្តរជាតិលើកទី២ ឆ្នាំ២០២៦ នៅកម្ពុជា។
ក្នុងឱកាសនោះ ឯកឧត្តមបណ្ឌិត ថោង ខុន បានកោតសរសើរចំពោះ ក្រុមហ៊ុន វឌ្ឍនៈ ហ្គោល រីហ្សត ដែលបានបន្តកិច្ចសហការជាមួយ Legends Tour ដើម្បីនាំព្រឹត្តិការណ៍កីឡាវាយកូនហ្គោលអាជីពលំដាប់ពិភពលោកមកកម្ពុជាជាថ្មី បន្ទាប់ពីការរៀបចំប្រកបដោយជោគជ័យកាលពីឆ្នាំ២០២៥។
ឯកឧត្តមបណ្ឌិត ក៏បានបញ្ជាក់ពីការគាំទ្រ និងការត្រៀមបន្តកិច្ចសហការជាមួយក្រុមហ៊ុន វឌ្ឍនៈ ហ្គោល រីហ្សត ដើម្បីរួមចំណែកធានាឱ្យព្រឹត្តិការណ៍នេះប្រព្រឹត្តទៅដោយជោគជ័យ ព្រមទាំងលើកកម្ពស់វិស័យកីឡាវាយកូនហ្គោល និងផ្សព្វផ្សាយសក្តានុពលកីឡាទេសចរណ៍របស់កម្ពុជាទៅកាន់ទីផ្សារអន្តរជាតិ។
ព្រឹត្តិការណ៍ឆ្នាំ២០២៦ រំពឹងថានឹងមានទ្រង់ទ្រាយកាន់តែធំ និងទាក់ទាញកីឡាករវាយកូនហ្គោលអាជីពលំដាប់អន្តរជាតិជាច្រើនមកចូលរួមប្រកួត ក្នុងកម្មវិធីសំខាន់ៗចំនួនពីរ៖
១. Vattanac Legends Championship ចាប់ពីថ្ងៃទី២៣ ដល់ថ្ងៃទី២៩ ខែវិច្ឆិកា ឆ្នាំ២០២៦ នៅទីលានវាយកូនហ្គោល វឌ្ឍនៈ ហ្គោល រីហ្សត រាជធានីភ្នំពេញ។
២. Vattanac Tour Championship ដែលជាការប្រកួតវគ្គផ្តាច់ព្រ័ត្រប្រចាំរដូវកាលរបស់ Legends Tour ចាប់ពីថ្ងៃទី៣០ ខែវិច្ឆិកា ដល់ថ្ងៃទី៦ ខែធ្នូ ឆ្នាំ២០២៦ នៅទីលានវាយកូនហ្គោល វឌ្ឍនៈ ហ្គោល រីហ្សត រាជធានីភ្នំពេញ។
ក្រៅពីការប្រកួតសំខាន់ៗទាំងពីរ ក្រុមហ៊ុន វឌ្ឍនៈ ហ្គោល រីហ្សត ក៏គ្រោងរៀបចំសកម្មភាពអមជាច្រើនទៀត ដើម្បីបង្កើនភាពទាក់ទាញ និងផ្តល់បទពិសោធកាន់តែប្រសើរដល់កីឡាករ ភ្ញៀវកិត្តិយស និងអ្នកគាំទ្រ។
ព្រឹត្តិការណ៍ Vattanac Legends Championship និង Vattanac Tour Championship 2026 គ្រោងនឹងផ្សព្វផ្សាយទៅកាន់ទស្សនិកជនរាប់រយលាននាក់នៅអាស៊ី អឺរ៉ុប និងអាម៉េរិក តាមរយៈបណ្ដាញផ្សព្វផ្សាយអន្តរជាតិធំៗ ដូចជា Sky Sports, GOLF Channel, CANAL+, VIASAT SPORT, SuperSport និង BTV News ជាដើម។
