ភ្នំពេញ៖ ដោយទទួលបានការអនុញ្ញាតដ៏ខ្ពង់ខ្ពស់ពី ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា បានឱ្យមជ្ឈមណ្ឌលជាតិហ្វឹកហ្វឺនកីឡា រៀបចំ ជាវគ្គខ្លីមួយដើម្បីបំប៉នវិន័យនិងសីលធម៌នៃការត្រៀមលក្ខណៈចូលរួមការប្រកួតកីឡាស៊ីហ្គេមលើក៣៣ នៅឯប្រទេសថៃដែលនឹងចាប់ផ្តើមនៅថ្ងៃទី៩-២០ ខែធ្នូខាងមុខនេះ។
ឯកឧត្តម វ៉ាត់ ចំរើន រដ្ឋលេខាធិការក្រសួងអប់រំយុវជន និងកីឡាបានថ្លែងថា៖ នេះជាវគ្គមួយដែលបំប៉នស្មារតី បច្ចេកទេស ផ្នែកសុខភាពផ្លូវកាយនិងសុខភាពផ្លូវចិត្ត ហើយយើងក៍បានដាក់នូវវិធានការនិងវិន័យផ្សេងៗទៀត ដែលពាក់ព័ន្ធទៅនឹងសមត្ថភាពខ្ពស់ របស់កីឡាករកីឡាការិនី ដែលទទួលបានគោលការណ៍ពីថ្នាក់ដឹកនាំរួចហើយ។
ឯកឧត្តមបន្តថាក៏បានដាស់តឿនទៅកាន់ប្រតិភូគ្រូបង្វឹកនូវយន្តការសំខាន់ៗ រួមមាន ការចូលរួមជាកិត្តិយសតំណាងមុខមាត់កម្ពុជា ការធានាឱ្យបាននូវសុខសុវត្ថិភាពពេលប្រកួត និងពេលត្រឡប់មកទឹកដីកំណើតវិញ។
ជាពិសេសការជំរុញឱ្យអត្តពលិកដណ្តើមឱ្យបាននូវកិត្តិយសជូនជាតិក្នុងកាលៈទេសៈដ៏សំខាន់មួយនេះ។
ព្រឹត្តិការណ៍កីឡាអាស៊ីអាគ្នេយ៍លើកទី៣៣ នឹងចាប់ផ្តើមប្រកួតផ្លូវការពីថ្ងៃទី៩ ដល់ថ្ងៃទី២០ ខែធ្នូ ឆ្នាំ២០២៥ ក្នុងនោះម្ចាស់ផ្ទះថៃ បានដាក់៥០ប្រភេទកីឡា លើ៥៧៤វិញ្ញាសា ដើម្បីប្រជែងមេដាយ។
គួបញ្ជាក់ផងដែរថា៖ ប្រតិភូគ្រូបង្វឹកអត្តពលិកទាំង ១២ប្រភេទកីឡាដែលបានចូលរួមវគ្គស្តីពីវិន័យនេះ រួមមាន អត្តពលកម្ម, ហែលទឹក, ជិះសេះ, គុនដាវ, ជឺជិតស៊ូ, បាល់ទាត់លើតុ, កីឡាអេឡិចត្រូនិក, ម៉ូតូទឹក, កាយសម្ព័ន្ធ, ឃីកបុកស៊ីង, ទ្រីយ៉ាត្លុង និង តេក្វាន់ដូ។ សិក្សារយៈពេល២ថ្ងៃ នៅមជ្ឈមណ្ឌលជាតិហ្វឹកហ្វឺនកីឡា ចាប់ពីថ្ងៃទី១-២ ខែធ្នូ ឆ្នាំ២០២៥ទើបបញ្ចប់៕
